Për një kohë të gjatë është konsideruar si vendi më i nxehtë në Tokë, por të dhënat e reja tregojnë se “Lugina e Vdekjes” në Kaliforni nuk është në të vërtetë vendi më i ngrohtë në planetin tonë.

Ndërsa ngrohtësia e ajrit në Luginën e Vdekjes mund të arrijë 56.7 °C, temperaturat janë shumë më të larta në dy vende të tjera.

Shkretëtirat e Lutit në Iran dhe Sonora në Meksikë (në kufi me SHBA) janë vendet me  temperaturat me të larta në sipërfaqen e Tokës, temperatura që arrijnë deri në 80.8 °C, të regjistruara përkatësisht në verën e vitit 2018 dhe 2019.

Nga ana tjetër, temperatura më e ulët është regjistruar në 2016 në Antarktidë (-110.9 °C). Ndryshimi më i madh i temperaturës në një ditë ishte 81.8 °C – nga -23.7 në 58.1 °C dhe u regjistrua në 20 korrik 2006 në rajonin Qaydam të Kinës, në pllajën tibetiane.

Sidoqoftë, zona të shumta të planetit tonë nuk kanë  matës të tillë dhe temperaturat e sipërfaqes mund të llogariten vetëm me ndihmën e mjeteve satelitore. Temperaturat në sipërfaqe priren të jenë më të larta se ato të ajrit në të njëjtën zonë, veçanërisht kur bien rrezet e diellit (për të njëjtën arsye për shembull rëra në një plazh djeg më shumë sesa ajri).

Sipas studiuesve, mbetet e paqartë nëse ndryshimi i klimës ka ndikuar në rritjen e  temperaturave në sipërfaqen e Tokës./Motilokal.com