Agjencia amerikane e Hapësirës (NASA) e ka zgjedhur kompaninë private amerikane SpaceX, të ndërtojë anijen kozmike, e cila, sipas agjencisë, do t’i kthejë amerikanët në Hënë.

SpaeceX ka mposhtur konkurrentët Blue Origin dhe Dynetics, duke fituar kontratën në vlerë të 2.89 miliard dollarëve, ka thënë NASA.

"Sot jam shumë e ngazëllyer dhe të gjithë jemi shumë të entuziazmuar që njoftojmë se i kemi dhënë SpaceX për të vazhduar zhvillimin e sistemit tonë të integruar të uljes njerëzore", tha Lisa Watson-Morgan nga NASA.

Vitin e kaluar, SpaceX u bë firma e parë private që dërgoi me sukses një ekuipazh në Stacionin Hapësinor Ndërkombëtar, duke rivendosur kapacitetin amerikan për të arritur këtë arritje për herë të parë që kur mbaroi programi Shuttle.

NASA nuk ka ofruar më shumë të dhëna rreth datës së nisjes së misionit të njohur si Artemis.

Artemis synon të dërgojë një burrë dhe një grua në sipërfaqen e Hënës, çka më pas do të shënonte herën e parë të dërgimit të njerëzve në Hënë prej vitit 1972.

Administrata e ish-presidentit amerikan Donald Trump pati thënë se vitit 2024 është afati i fundit.

SpaceX, që veçse është duke punuar vazhdimisht me NASA-n është duke zhvilluar anijen kozmike Starship, e cila do të përdoret për misionin në Hënë.

Një numër prototipash kanë shpërthyer gjatë testimeve të pajisjes pa ekip.

Mirëpo udhëheqësi i kësaj kompanie Elon Musk nuk është zmbrapsur, duke thënë se Starship do të jetë projekt i suksesshëm për bartje të njerëzve dhe vendosje të satelitëve në orbitë.

NASA planifikon që ekipi i saj të fluturojë në Hënë me anijen e saj kozmike Orion, dhe më pas të bartet në Starship për t’u ulur në sipërfaqen e Hënës./Motilokal.com