Mijëra njerëz janë detyruar të largohen nga shtëpitë e tyre në Filipine për shkak të tajfunit Molave, i cili ka prekur rajonet në jug të kryeqytetit Manila.

Sipas autoriteteve deri më tani nuk janë raportuar viktima nga tajfuni, shpejtësia e erës së të cilit ka shkuar në mbi 125 kilometra në orë, por të paktën një person në Batangas mbetet i zhdukur dhe shtatë janë shpëtuar pas fundosjes së disa jahteve.

Zyra e Mbrojtjes Civile ka deklaruar se rreth 20 mijë nga të paktën 25 mijë njerëz të cilët janë zhvendosur për shkak të tajfunit që shkaktoi përmbytje dhe rënien e çative në fshatra janë strehuar në shkolla dhe ndërtesa qeveritare që janë kthyer në qendra evakuimi.

“Fshatarët po presin të shpëtohen nga era e papritur që çon çatitë”, i tha radios DZMM guvernatori i rajonit Oriental Mindoro, Humerlito Dolor.

Dolor tha se reshjet e mëdha të shiut që shpërthyen brenda natës përmbytën fshatrat që merren me bujqësi në rajon, duke shtuar se erërat e forta rrëzuan pemët dhe shtyllat e energjisë dhe shkaktuan ndërprerje të energjisë.

Ai tha se pas tajfunit, autoritetet në disa qytete filluan të heqin rrënojat për të pastruar rrugët.

Nga ana tjetër, më shumë se 1.800 shoferë kamionësh, punëtorë dhe pasagjerë janë bllokuar në porte pasi ekipet e rojës bregdetare mbyllën trafikun detar për shkak të motit.

Molave vjen pas stuhisë Tropikale Saudel, e cila javën e kaluar shkaktoi përmbytje të përhapura në provincën Quezon në rajonin Calabarzon, në juglindje të kryeqytetit Manila.

Rreth 20 tajfun dhe stuhi çdo vit godasin Filipinet dhe arkipelagu i Azisë Juglindore është sizmikisht aktiv, me tërmete dhe shpërthime vullkanike, duke e bërë atë një nga vendet më të prirura për katastrofa në botë./Motilokal.com