Shkencëtarët e Hong Kongut kanë njoftuar për rastin e parë në botë të ri-infektuar me koronavirus, por ata theksojnë se është shumë herët për konkludime.

Ata thonë se analiza gjenetike tregoi se këto dy infeksione të njëpasnjëshme të të njëjtit pacient ishin shkaktuar nga dy lloje të ndryshme të SARS-CoV-2, virusi përgjegjës për COVID-19, duke e bërë atë rastin e parë të ri-infeksionit në botë.

Organizata Botërore e Shëndetit paralajmëron se është e rëndësishme të mos hidheni në përfundime bazuar në rastin e një pacienti.

Ekspertët thonë se ri-infeksionet mund të jenë të rralla dhe jo domosdoshmërisht serioze.

Ka pasur më shumë se 23 milionë raste të infeksionit me koronavirus në të gjithë botën.

Të infektuarit zhvillojnë një përgjigje imune pasi trupat e tyre luftojnë kundër virusit i cili ndihmon në mbrojtjen e tyre nga kthimi i tij.

Përgjigja më e fortë imune është gjetur tek pacientët me sëmundje më serioze.

Por ende nuk është e qartë se sa e fortë është kjo mbrojtje ose imunitet - ose sa zgjat.

“Rezultatet tona sugjerojnë që SARS-CoV-2 mund të vazhdojë të qarkullojë në popullatë, siç është rasti me koronaviruset e tjerë përgjegjës për ftohjet e zakonshme, edhe pse pacientët kanë fituar imunitet”, thonë ekspertët.

“Meqenëse imuniteti nuk mund të zgjasë shumë pas infeksionit, vaksinimi duhet të konsiderohet edhe për ata që tashmë janë infektuar,” vlerësojnë ata.

Një pacient 33-vjeçar në Hong Kong, doli pozitiv për herë të parë më 26 mars, pasi tregoi simptoma të tilla si kollë, dhimbje koke, dhimbje të fytit dhe ethe. Kur u shërua, ai u testua dy herë dhe ishte negativë dy herë. Megjithatë, më 15 gusht, ai doli përsëri pozitiv.

"Ky është një rast shumë i rrallë i rikthimit", tha Brendan Wren, profesor i patogjenezës mikrobike, në Shkollën e Higjienës dhe Mjekësisë Tropikale në Londër.

"Dhe nuk duhet të mohojë përpjekjen globale për të zhvilluar vaksinat Covid-19”, tha ai.

Dr. Jeffrey Barrett nga Instituti Wellcome Sanger, tha: "Duke pasur parasysh numrin e infeksioneve globale deri më sot, të shohësh një rast të ri-infektuar nuk është aq befasuese edhe nëse është një dukuri shumë e rrallë.

"Mund të jetë që infeksionet e dyta, kur ato ndodhin, nuk janë serioze - megjithëse nuk e dimë nëse ky person ishte infektues gjatë episodit të tyre të dytë".

Prof. Paul Hunter, nga Universiteti i Anglisë Lindore, tha se duhen më shumë informacione në lidhje me këtë dhe raste të tjera të ri-infeksionit "para se të mund t'i kuptojmë vërtet implikimet"./Motilokal.com