Spanja është vënë në gatishmëri të lartë për shkak të një vale të re stuhish të fuqishme, pas përmbytjeve të mëdha që kanë shkaktuar dëme materiale, ndërprerje të transportit dhe një viktimë në Katalonjë.

Autoritetet kanë lëshuar alarm të kuq për Majorkën dhe Valencian, ndërsa ushtria spanjolle është mobilizuar në Ishujt Balearik për të mbështetur ekipet e emergjencës. Agjencia meteorologjike spanjolle AEMET ka paralajmëruar për fenomene jashtëzakonisht të rrezikshme dhe reshje intensive, veçanërisht në zonat që tashmë janë prekur nga moti i keq.

Shqetësimi është i madh në Valencia, e cila në vitin 2024 u godit nga përmbytje shkatërruese me shumë viktima, si dhe në Majorka, ishulli më i madh i arkipelagut Balearik.

Bilanci i motit të keq është rënduar nga vdekja e një gruaje në zonën e Cabrera de Mar, rreth 25 kilometra në verilindje të Barcelonës. Ajo dyshohet se u mor nga rrjedha e një përroi të fryrë nga shirat e rrëmbyeshëm. Trupi i saj u gjet në det të dielën, më 18 tetor, pas kërkimeve nga ekipet e emergjencës.

Ndërkohë, në Katalonjë, Valencia, Andaluzi dhe Ishujt Balearik janë regjistruar qindra incidente të lidhura me motin e keq. Përmbytjet kanë depërtuar në banesa, kanë bllokuar rrugë dhe kanë rrëzuar pemë, duke shkaktuar dëme të konsiderueshme materiale.

Për shkak të rrezikut nga reshjet e vazhdueshme, autoritetet rajonale kanë vendosur mbylljen e shkollave në Majorka, Ibiza dhe Formentera. Në Valencia, shërbimet hekurudhore janë pezulluar deri në një njoftim të ri, ndërsa qytetarëve u është kërkuar të shmangin udhëtimet e panevojshme.

Paralajmërime emergjente janë dërguar edhe në telefonat celularë të banorëve të Valencias, Ibizës dhe Formenterës, me udhëzime për të kufizuar lëvizjet në zonat më të rrezikuara.

Situata paraqitet veçanërisht e vështirë në Ibiza, ku reshjet e dendura kanë përmbytur rrugë dhe kanë lënë automjete të zhytura në ujë e baltë. Rruga kryesore drejt aeroportit është mbyllur, ndërsa transporti ajror është përballur me pengesa të shumta.

Sipas operatorit shtetëror të aeroporteve, Aena, të paktën pesë fluturime janë anuluar dhe 16 të tjera janë devijuar drejt aeroporteve alternative. Probleme të ngjashme janë raportuar edhe me fluturime të tjera.

Për të përballuar situatën, ushtria spanjolle ka dërguar trupa në Ibiza dhe Majorka, në mbështetje të ekipeve lokale të shpëtimit dhe emergjencës.

Përmbytjet kanë prekur edhe jugun e vendit. Në Almeria, në rajonin e Andaluzisë, shërbimet e emergjencës kanë kryer 37 operacione shpëtimi brenda 48 orëve. Ndërsa pranë Malagas, dhjetë persona mbetën të bllokuar brenda një tuneli të përmbytur të shtunën në mbrëmje, por ekipet e zjarrfikësve arritën t’i nxirrnin të gjithë në siguri.

Autoritetet spanjolle vazhdojnë të monitorojnë situatën, ndërsa paralajmërimet për stuhi të reja mbajnë në gatishmëri shërbimet e emergjencës dhe rrisin shqetësimet për përmbytje të tjera, dëme materiale dhe ndërprerje të transportit në disa pjesë të vendit.

/Motilokal.com