Presidenti i SHBA-së, Donald Trump, ka deklaruar se kompanitë e inteligjencës artificiale duhet të marrin përsipër kostot e ndërtimit të infrastrukturës energjetike që nevojitet për funksionimin e qendrave të reja të të dhënave.

Ai u bëri thirrje komuniteteve lokale që t’i mbështesin këto projekte, duke i cilësuar ato si të rëndësishme për ruajtjen e epërsisë teknologjike të Shteteve të Bashkuara.

Gjatë një fjalimi në selinë e Agjencisë për Mbrojtjen e Mjedisit (EPA) në Washington, Trump tha se mbi 220 kompani të energjisë, kompani teknologjike dhe qeveri shtetërore kanë nënshkruar një zotim për mbrojtjen e konsumatorëve. Sipas tij, ky plan tashmë mbulon tarifat e energjisë për rreth 80 për qind të energjisë elektrike të shpërndarë në SHBA.

“Këto kompani po investojnë shuma të jashtëzakonshme parash në komunitetet lokale”, deklaroi Trump.

Ai gjithashtu pretendoi se disa vende të huaja po përpiqen të pengojnë zgjerimin e infrastrukturës amerikane të inteligjencës artificiale përmes fushatave të ndikimit dhe “propagandës”, me synim dobësimin e mbështetjes lokale për ndërtimin e qendrave të të dhënave.

“Nëse nuk e bëjmë këtë, do të mbetemi prapa. Duhet t’u shpjegoni komuniteteve se sa të rëndësishme janë këto projekte. Nuk duhet t’i kundërshtoni, por t’i përqafoni”, tha ai.

Trump i cilësoi komunitetet që mirëpresin qendrat e të dhënave si “komunitete të zgjuara”, duke theksuar se këto objekte sjellin mijëra vende pune dhe kanë ndikim të kufizuar në jetën e përditshme të qytetarëve.

/Motilokal.com