Një zhvillim i rëndësishëm për ruajtjen e biodiversitetit është shënuar në Shqipëri. Shoqata e Ruajtjes dhe e Mbrojtjes së Mjedisit Natyror njofton se një individ i rrëqebullit të Ballkanit është dokumentuar nga një kamerë kurth në një zonë të re në juglindje të vendit, në kufirin mes rajoneve të Korçës dhe Skraparit.

Sipas ekspertëve, ky është regjistrimi më jugor i konfirmuar i rrëqebullit të Ballkanit jo vetëm në Shqipëri, por edhe në të gjithë rajonin e Ballkanit. Zbulimi konsiderohet me rëndësi të veçantë shkencore, pasi ofron të dhëna të reja mbi praninë dhe shpërndarjen e kësaj specieje, e cila është e rrezikuar në mënyrë kritike.

Ekspertët theksojnë se dokumentimi i ri mund të tregojë zgjerimin e mundshëm të habitatit të rrëqebullit drejt territoreve më jugore ose përdorimin e korridoreve ekologjike që deri më tani nuk ishin dokumentuar. Këto informacione do të ndihmojnë në identifikimin e habitateve kyçe dhe në planifikimin e masave më efektive për mbrojtjen e kësaj specieje.

Ndërkohë, imazhi i regjistruar do t'i nënshtrohet analizave të detajuara dhe do të krahasohet me të dhënat e mbledhura ndër vite për të konfirmuar identitetin e individit. Po ashtu, në zonë do të vendosen kamera të tjera kurth për të vazhduar monitorimin e lëvizjeve dhe përdorimit të habitatit nga rrëqebulli.

Sipas Programit të Rimëkëmbjes së Rrëqebullit të Ballkanit (BLRP), çdo regjistrim i ri përbën një hap të rëndësishëm drejt kuptimit më të mirë të shpërndarjes së kësaj specieje të rrallë dhe forcimit të përpjekjeve për mbrojtjen e rrjetit ekologjik nga i cili varet mbijetesa e saj.

/Motilokal.com