Vendi i fundit ku mund të prisni të gjeni gaforre të gatuara është në akullore, por pikërisht këtë po shërben një dyqan akulloresh në Hjuston të Teksasit gjatë kulmit të sezonit të gaforreve në pranverë.

Pronarja e akullores Red Circle, Nickey Ngo, i tha Reuters se filloi të shërbente akullore me gaforre në vitin 2019, kur i lindi ideja ndërsa hante gaforre në një takim familjar.

Procesi fillon duke përzier gjalpin e shkrirë, erëzat Cajun, hudhrën dhe përbërës të tjerë përpara se të shtohen gaforret e gjalla për t’u gatuar. Lëngjet e gaforres, gjalpi dhe erëzat shtohen më pas në një bazë kremoze që përzihet me një makinë për të formuar akullore me gaforre. Gaforrja e gatuar vendoset sipër, me masha që varen mbi pjatë.

Ngo ofron disa këshilla përpara se t'u shërbejë klientëve kuriozë akulloren, e cila ka një shije detare të ëmbël, të kripur dhe pikante.

"Sigurisht, të rekomandoj të mos puthësh askënd pasi të të jap akullore", tha ajo.

Ngo rekomandon që mysafirët të hanë së pari mishin e gaforres pasi t’ia kenë hequr kokën gaforres, pastaj ta përdorin atë kokë për të mbledhur akulloren si me lugë.

Vlerësimet midis klientëve ishin të përziera, me disa që nuk ishin të kënaqur, ndërsa të tjerë u befasuan këndshëm pasi provuan akulloren me gaforre.

Mysafirja e dyqanit të akulloreve, Lauren Moore, tha se shijet ishin perfekte.

"Më pëlqen. Është pak i kripur, por është kremoz, i butë. Pak pikant", tha ajo.

Ngo tha se që nga janari ajo ka marrë telefonata nga klientë që kërkojnë akullore me gaforre.

/Motilokal.com