“Qarkullo dhe krijo” nuk është thjesht një slogan, por një mënyrë mendimi që po udhëheq gjithnjë e më shumë sipërmarrje drejt një zhvillimi të qëndrueshëm.

Në Durrës, kompania “Edi Pack” është një shembull i qartë i kësaj qasjeje. Ajo ka ndërtuar një cikël të plotë pune, ku gjithçka nis me prodhimin e letrës dhe kartonit, vazhdon me riciklimin dhe mbyllet me rikthimin e tyre në përdorim. Një proces i thjeshtë në dukje, por me ndikim të madh për mjedisin.

Modeli i kësaj kompanie u soll në vëmendje edhe nga Kryeministri Edi Rama, si një dëshmi konkrete se si riciklimi mund të kthehet në një motor zhvillimi dhe jo vetëm në një nevojë mjedisore.

Themeluesi, Bardhyl Baltëza, tregon se rruga e “Edi Pack” ka nisur prej 30 vitesh. Sot kompania shtrihet në rreth 28 mijë metra katrorë dhe bashkëpunon me afro 400 klientë, duke u rritur vazhdimisht.

Ajo funksionon me 184 punonjës dhe përdor teknologji moderne europiane, të certifikuara për standarde cilësie. Prodhimet përfshijnë karton dhe paketime të ndryshme, përfshirë edhe karton ushqimor me certifikim ISO.

Për Baltëzën, kujdesi për mjedisin nuk është zgjedhje dytësore, por përgjegjësi. Sepse ajo që kemi sot, është ajo që do t’u lëmë brezave që vijnë.

Me këtë qasje, “Edi Pack” tregon se riciklimi nuk është vetëm mbrojtje e natyrës, por edhe një burim i qëndrueshëm punësimi dhe zhvillimi për ekonominë lokale.

/Motilokal.com