Një ngrohje e madhe stratosferike po zhvillohet në atmosferë. Ky është një fenomen i rrallë që mund të përmbysë erërat lart mbi Arktik dhe të ndajë vorbullën polare.

Shenjat e para tashmë po shihen në parashikime. Modelet meteorologjike tregojnë se ndikimi mund të zbresë gradualisht në shtresat më të ulëta të atmosferës gjatë gjysmës së dytë të marsit, shkruan Severe Weather Europe.

Vorbulla polare është një zonë e madhe ajri shumë të ftohtë dhe erërash të forta që rrotullohet rreth Arktikut gjatë dimrit. Kur është e qëndrueshme, ajri i ftohtë mbetet kryesisht i “mbyllur” në veri dhe Evropa zakonisht ka periudha më të buta dhe më të qeta.

Por kur kjo vorbull dobësohet ose ndahet, ajo pengesë prishet. Si pasojë rritet mundësia për ndryshime më të mëdha të motit në gjerësitë e mesme, përfshirë edhe Evropën.

Megjithatë kjo nuk do të thotë se i gjithë kontinenti hyn automatikisht në një valë të ftohtë. Shpesh ndodh që shpërndarja e presionit të lartë dhe të ulët ndryshon. Një pjesë e Evropës mund të ketë mot më të ngrohtë dhe më të qëndrueshëm, ndërsa një tjetër përballet me ajër më të freskët dhe kushte më të paqëndrueshme.

Ngrohja stratosferike ndodh shumë lart në atmosferë, mbi shtresën ku formohen retë dhe reshjet. Por ajo mund të nisë një lloj reaksioni zinxhir. Në këto raste temperaturat në stratosferë rriten ndjeshëm dhe erërat mund të ndryshojnë drejtim, një shenjë se vorbulla polare është dobësuar seriozisht.

Ky efekt zakonisht nuk ndihet menjëherë në tokë. Nëse zbret drejt shtresave më të ulëta të atmosferës, ndikimi shfaqet zakonisht pas 10 deri në 30 ditësh. Këtë herë parashikimet sugjerojnë se gjatë marsit mund të krijohet një model më i theksuar, me kontraste më të mëdha të motit në pjesë të ndryshme të Evropës.

Parashikimet afatshkurtra tregojnë forcim të presionit të lartë mbi Evropë. Kjo zakonisht sjell mot më të qëndrueshëm dhe temperatura mbi mesataren në disa zona të kontinentit. Në të njëjtën kohë, rajonet që mbeten nën ndikimin e presionit më të ulët mund të kenë mot më të ndryshueshëm, me depërtime të herëpashershme të ajrit më të freskët.

Ndërsa afrohet mesi i marsit, disa modele tregojnë forcim të rrjedhës perëndimore nga Atlantiku. Kjo zakonisht sjell më shumë lagështi, më shumë re dhe reshje më të shpeshta, sidomos në Evropën perëndimore dhe qendrore. Në këtë situatë, pranvera mund të jetë më e paqëndrueshme, me ndryshime të shpejta nga dita në ditë.

Edhe për gjysmën e dytë të marsit parashikimet flasin për një model të ndarë. Sistemet e presionit mund të sjellin ajër më të ngrohtë në një pjesë të Evropës, ndërsa në një tjetër mot më të freskët dhe më të paqëndrueshëm.

Në raste të tilla, pjesët veriore dhe verilindore të kontinentit kanë më shumë gjasa të mbeten në masa ajri më të ngrohta. Ndërsa Evropa qendrore dhe jugore mund të përjetojnë më shpesh depërtimin e ajrit më të freskët dhe mot më të ndryshueshëm.

/Severe Weather Europe/Motilokal.com