Nutricionistët dhe shefat e kuzhinës pohojnë se ushqimi i ngrirë ka përparësi të shumta ndaj atij të freskët, dhe siç shpjegojnë ata, këto përparësi nuk janë vetëm ushqyese, por edhe praktike.

Domethënë, ngrirja "bllokon" lëndët ushqyese që humbasin gjatë transportit dhe ruajtjes. Ekspertët theksojnë se frutat dhe perimet e ngrira ndonjëherë e tejkalojnë vlerën ushqyese të ushqimeve të freskëta.

Çelësi qëndron në procesin e ngrirjes së shpejtë disa orë pas vjeljes së frutave ose perimeve, kur frutat janë në kulmin e pjekurisë së tyre.

"Brenda pak orësh nga vjelja, frutat dhe perimet e pjekura ngrihen shpejt për të 'bllokuar' vlerën e tyre ushqyese. Krahasuar me produktet e freskëta, të cilat ruhen në kamionë dhe në raftet e dyqaneve, produktet e ngrira i ruajnë lëndët ushqyese", tha dietologia McKenzie Jones.

Dr. Meena Malhotra thekson se frutat e ngrira i ruajnë vitaminat në një mënyrë që produktet e freskëta shpesh nuk munden.

"Manaferrat janë një shembull i përsosur. Ato të ngrira kanë më shumë vitaminë C sesa ato të freskëta. E njëjta gjë vlen edhe për spinaqin, bizelet dhe lulelakrën", tha ajo.

Përveç kësaj, ekspertët e nxjerrin në pah peshkun e ngrirë dhe ushqimet e detit si një zgjedhje të zgjuar, shkruan Mirror.

"Peshku i ngrirë zakonisht ngrihet disa orë pasi është kapur, gjë që ndihmon në ruajtjen e freskisë. Peshku fillon të humbasë lagështinë, acidet yndyrore omega-3 dhe vitaminat e ndjeshme ndaj nxehtësisë sapo nxirret nga uji", tha mjeku.

Ndërsa ka një sërë përfitimesh, ekspertët kanë identifikuar ushqimet që është më mirë të blihen të freskëta, duke përfshirë domatet, kastravecët dhe avokadot. Përveç kësaj, qasja ideale ndaj të ngrënit përfshin një kombinim të ushqimeve të freskëta dhe të ngrira për të përfituar nga të dyja opsionet.

/Motilokal.com