Shërbimi meteorologjik zviceran ka hedhur poshtë zërat për një “dimër të shekullit” këtë vit. Sipas MeteoSwiss, stina pritet të jetë më e butë, siç raporton Keystone SDA. Një fenomen i rrallë mbi Polin e Veriut ka ndezur thashethemet për të ftohtë ekstrem në Evropë dhe Zvicër. Bëhet fjalë për ngrohjen e papritur stratosferike, e njohur si SSW.

Zakonisht, një vorbull e fortë polare mban ajrin e ftohtë të bllokuar mbi Arktik. Kur kjo vorbull dobësohet, temperaturat në stratosferë, në lartësi 10 deri në 50 kilometra, mund të rriten deri në 50 gradë brenda pak ditësh. Ky ndryshim ndikon në lëvizjen e ajrit polar dhe mund të rrisë gjasat për periudha më të ftohta në disa zona të botës.

MeteoSwiss konfirmon se vorbulla polare mbi Arktik po dobësohet dhe po deformohet rreth 30 kilometra lartësi. Në dy javët e ardhshme pritet një rritje e ndjeshme e temperaturave në këtë shtresë të atmosferës. Një situatë e tillë është vërejtur vetëm tri herë kaq herët në sezon në 70 vitet e fundit, në vitet 1958, 1968 dhe 2000.

Megjithatë, ndikimi i këtij ndryshimi në dimrin e Zvicrës mbetet i paqartë. E rëndësishme është nëse këto luhatje zbresin nga stratosfera në troposferë, shtresa që përcakton motin e përditshëm. Shpesh, goditjet e të ftohtit prekin më shumë Amerikën e Veriut se Evropën. Vorbulla polare mund të stabilizohet sërish, ndaj efektet nuk mund të parashikohen për gjithë sezonin.

Për këtë arsye, perspektiva sezonale mbetet e pandryshuar. Mundësia që Zvicra të përjetojë një dimër të ftohtë nga nëntori në janar është ende e ulët. Për dhjetorin priten devijime të vogla nga mesatarja, ndërsa për janarin dhe shkurtin ka gjasa më të larta që temperaturat të jenë mbi normë.

Në çdo rast, parashikimet sezonale mbeten të pasigurta. Parashikimet afatgjata për Evropën Qendrore, dhe rrjedhimisht për Zvicrën, ende kanë kufizime të mëdha në saktësi.

/Motilokal.com