Edhe pse shpesh shihet si një formalitet i zakonshëm, ndryshimi i orës ka ndikim të drejtpërdrejtë në jetën e përditshme. Nga gjumi dhe përqendrimi, te humori dhe energjia, trupi ynë reagon ndaj prishjes së ritmit natyral. Në vend të një ore më shumë pushim, shpesh përballemi me lodhje, nervozizëm dhe ulje të produktivitetit.
Prej vitesh në Evropë po diskutohet heqja e kësaj praktike, por ende vazhdon të zbatohet dy herë në vit, pranverë dhe vjeshtë me arsyetimin se shfrytëzohet më mirë drita e ditës. Në realitet, ky ndryshim shpesh sjell më shumë shqetësime sesa përfitime, sidomos për fëmijët dhe të moshuarit, të cilët e kanë më të vështirë përshtatjen.
Ekspertët paralajmërojnë se efektet nuk duhen marrë lehtë dhe këshillojnë që tranzicioni të bëhet gradualisht, në mënyrë që organizmi të mos pësojë tronditje të papritur.
Kur ndryshon ora?
Në vjeshtën e vitit 2025, kthimi i orës do të ndodhë më 26 tetor, të dielën, në orën 03:00 të mëngjesit, kur akrepat do të kthehen një orë pas në 02:00. Praktikisht fitojmë një orë më shumë gjumë, por humbasim një pjesë të dritës së ditës. Dhe ndërsa shumica mendojnë se kjo është një mundësi për të fjetur më gjatë, pasojat shpesh ndihen më gjatë se një natë.
Pse zbatohet ky ndryshim?
Arsyetimi zyrtar është kursimi i energjisë dhe përdorimi më i mirë i dritës së ditës. Por në praktikë, më shumë dritë në mëngjes nuk kompenson lodhjen dhe rënien e përqendrimit që ndjehet në pasdite.
Pasojat që shpesh injorohen
- Çrregullim i bioritmit, sidomos tek fëmijët dhe të moshuarit.
- Përgjumje dhe ulje të vëmendjes.
- Rrezik më i lartë për gjendje depresive, për shkak të errësirës më të hershme.
- Ndryshime në oreks dhe në cilësinë e gjumit.
5 gjëra që gjithmonë na shpëtojnë nga mendja
- Ora në mur, makinë apo pajisje shtëpiake nuk ndryshohet automatikisht.
- Ndjesia e “çuditshme” pas ndryshimit është krejt normale.
- Fëmijët përshtaten më ngadalë se të rriturit.
- Produktiviteti bie dukshëm gjatë javës së parë.
- Edhe pse flitet për heqjen e kësaj praktike, ajo ende mbetet në fuqi.
Si ta kalojmë më lehtë tranzicionin
- Filloni të rregulloni orarin e gjumit disa ditë më herët.
- Dilni në dritë natyrale sapo të zgjoheni.
- Shmangni ngarkesat e mëdha ditën e parë të javës.
- Mbani rutinë të qëndrueshme – trupi e do rregullsinë.
Ndryshimi i orës nuk është thjesht një veprim teknik, por një ndërhyrje që prek ritmin biologjik të organizmit. Lodhja, nervozizmi apo mungesa e përqendrimit nuk janë dobësi personale, por reagim normal i trupit ndaj prishjes së rutinës. Prandaj, më shumë se kurrë, duhet të jemi të durueshëm me veten dhe t’i ndihmojmë trupit të përshtatet përmes kujdesit, dritës natyrale dhe pushimit të mjaftueshëm.
/Motilokal.com
