Një nga dukuritë më të veçanta astronomike, eklipsi i plotë hënor, i quajtur ndryshe “Hëna e Përgjakur”, ka tërhequr vëmendjen e miliona njerëzve anembanë globit.

Gjatë fenomenit, Hëna u zhyt në hijen e Tokës dhe mori një nuancë të kuqërremtë magjike, duke krijuar një atmosferë të pazakontë mbi horizontin e natës.

Edhe në Kosovë, qielli i kthjellët u bë skenë e përsosur për qytetarët që dëshironin të shihnin nga afër këtë moment të rrallë. Pamje të ngjashme u shpërndanë nga metropole dhe qytete të ndryshme të botës, duke dëshmuar madhështinë e këtij spektakli qiellor.

“Hëna e Përgjakur” ndodh kur Dielli, Toka dhe Hëna rreshtohen në të njëjtën vijë. Në atë çast, hija e Tokës mbulon Hënën, ndërsa atmosfera filtron rrezet blu dhe lejon që sipërfaqja e saj të marrë shkëlqimin e kuq.

Ky fenomen nuk u përjetua vetëm si një ngjarje astronomike, por edhe si një përvojë shpirtërore në shumë vende të botës, ku njerëzit u mblodhën për meditim, rituale dhe vëzhgime të përbashkëta nën qiellin e natës.

/Motilokal.com