Hëna do të marrë një ngjyrë të kuqe mbresëlënëse në fundjavën e parë të shtatorit, falë një eklipsi total hënor që do të jetë i dukshëm nga shumë pjesë të botës.

Një eklips hënor ndodh kur Toka pozicionohet mes Diellit dhe Hënës, duke bërë që hija e saj të bjerë mbi sipërfaqen hënore dhe t’i japë asaj një nuancë të kuqe të thellë.

Sipas NASA-s, çdo eklips hënor mund të shihet nga gjysma e planetit.

Kur ndodh eklipsi total i shtatorit dhe sa do të zgjasë?

Ky fenomen do të ndodhë natën mes 7 dhe 8 shtatorit, në varësi të zonës kohore.

Në Kohën Universale të Koordinuar (UTC), eklipsi do të shfaqet gjatë ditës së 7 shtatorit.

Faza e plotësisë, kur Hëna mbulohet tërësisht nga hija e Tokës pritet të zgjasë rreth 1 orë e 22 minuta.

Në tërësi, procesi i eklipsit, nga fillimi deri në fund, do të zgjasë rreth 3 orë e 29 minuta.

Gjatë këtij procesi dallohen dy faza kryesore të hijes:

• Umbra – hije e brendshme, më e errët.
• Penumbrа – hije e jashtme, më e zbehtë.

Ku do të jetë i dukshëm eklipsi?

Eklipsi total hënor i shtatorit do të shihet qartë në Evropë, Afrikë, Azi dhe Australi.

Kjo do të thotë se fenomeni do të jetë i dukshëm vetëm nga një gjysmë e Tokës.

Çfarë është një eklips total hënor?

Sipas NASA-s, një eklips total hënor ndodh kur Toka, Hëna dhe Dielli rreshtohen në mënyrë të përsosur.

Ky është një dallim i rëndësishëm nga eklipsi i pjesshëm, ku rreshtimi nuk është i plotë.

Eklipset hënore shfaqen gjithmonë gjatë fazës së Hënës së plotë.

/Motilokal.com