Zyrtarët bashkiakë të Helsinkit bënë të ditur këtë javë se kryeqyteti finlandez nuk ka regjistruar asnjë viktimë fatale në aksidente trafiku gjatë vitit 2024, një sukses i rrallë për çdo qytet, e veçanërisht për një kryeqytet evropian.

Ndërkohë që numri i vdekjeve nga aksidentet rrugore në Bashkimin Evropian ka shënuar një rënie prej 3% gjatë vitit të kaluar, ngjarjet tragjike në rrugët urbane mbeten ende të shpeshta. Vetëm në vitin 2023, mbi 7,800 qytetarë të BE-së humbën jetën në aksidente trafiku nëpër qytete.

Për krahasim, Berlin raportoi 55 viktima në trafik gjatë të njëjtës periudhë, ndërsa në rajonin e Brukselit u shënuan nëntë humbje jete. Në këtë kontekst, fakti që Helsinki kaloi një vit të tërë pa asnjë viktimë është një arritje domethënëse.

Megjithëse Helsinki është ndër kryeqytetet më të vogla të BE-së, me rreth 690 mijë banorë, mbi 1.5 milion njerëz jetojnë ose udhëtojnë çdo ditë në zonën metropolitane.

Roni Utriainen, inxhinier trafiku në Divizionin e Mjedisit Urban të qytetit, deklaroi për mediat finlandeze se ky rezultat është fryt i shumë faktorëve, por nënvizoi se kufizimet e shpejtësisë kanë luajtur një rol kyç.

Sipas të dhënave, ulja e shpejtësisë nga 40 në 30 km/h përgjysmon rrezikun e vdekjes për këmbësorët në rast përplasjeje. Duke u bazuar në këtë, në vitin 2021 autoritetet vendosën kufij më të ulët shpejtësie në zonat e banuara dhe në qendrën e qytetit.

Kufizimet u shoqëruan me instalimin e 70 kamerave të reja të shpejtësisë dhe me një strategji të zbatimit rigoroz përmes politikës kombëtare “Vizioni Zero”, që synon eliminimin e të gjitha viktimave dhe lëndimeve në trafik.

Të dhënat nga Liikenneturva, agjencia për sigurinë rrugore në Finlandë, tregojnë se numri i vdekjeve nga aksidentet në Helsinki ka qenë në rënie të vazhdueshme që nga zbatimi i këtyre masave.

/Motilokal.com