Drejtoria e Bujqësisë në Komunën e Rahovecit ka publikuar disa rekomandime për fermerët, për shkak të kushteve atmosferike dhe rënies së temperaturave.
Sipas kësaj Drejtorie, në ditët në vijim pritet që temperaturat të bien nën 0°C, duke paraqitur rrezik për kulturat e mbjella, veçanërisht në sektorët e perimtarisë, pemëtarisë dhe vreshtarisë.
Rekomandime për kultivuesit në fushë të hapur:
- Ujitja në orët e mëngjesit ndihmon në ruajtjen e temperaturës në zonën e rrënjëve.
- Mos përdorni plehra azotikë gjatë kësaj periudhe.
- Mbulojeni tokën dhe bimët me najlon ose materiale mbrojtëse si gjeotekstil.
Rekomandime për kultivuesit në sera:
- Shtoni një shtresë të dytë najloni brenda serës ose përdorni gjeotekstil.
- Përdorni mjete të thjeshta për ngrohje.
- Ajrosni lehtë në mëngjes për të shmangur lagështinë e tepërt.
- Sigurohuni që najloni të jetë i shtrirë dhe i mbyllur mirë për të parandaluar hyrjen e ajrit të ftohtë.
Rekomandime për pemët dhe vreshtat:
- Mos kryeni krasitje të thellë gjatë kësaj kohe.
- Spërkatja e lehtë me ujë në orët e hershme të mëngjesit (para agimit) mund të ndihmojë në mbrojtjen e luleve nga ngricat.
Fermerët inkurajohen të marrin masa mbrojtëse dhe të tregojnë kujdes të shtuar gjatë këtyre ditëve të ndjeshme për bujqësinë.
/Motilokal.com
