Organizata Botërore Meteorologjike (WMO) raportoi se temperaturat mesatare tejkaluan ato të 30 viteve të fundit, duke përmendur ndryshimin e klimës si shkaktarin kryesor.

Clare Nullis, zëdhënëse e Organizatës Botërore Meteorologjike (WMO), shpjegoi se ata matën temperaturën në bazë të një periudhe 30-vjeçare dhe vuri në dukje se temperaturat e regjistruara i kaluan ato nga viti 1991 deri në 2020.

“Ndryshimet klimatike janë shtytësi më i madh i nxehtësisë ekstreme aktuale”, theksoi ajo.

Nullis tha se këtë verë janë thyer shumë rekorde të nxehtësisë dhe në shumë vende evropiane korriku ka qenë më i nxehti deri më tani. Ajo theksoi se temperatura më e lartë e regjistruar në Evropë mbetet ende, 48.8 gradë Celsius, e matur në Sicili më 11 gusht 2021.

Pas një korriku jashtëzakonisht të nxehtë, temperaturat e larta vazhdojnë edhe në gusht në Evropë.

Një valë të nxehti ka goditur Belgjikën, duke bërë që Instituti Mbretëror Meteorologjik të lëshojë paralajmërime për të nxehtin. Edhe Franca po lufton me temperatura jashtëzakonisht të larta. Agjencia franceze meteorologjike Meteo-France ka parashikuar se vapa do të prekë pothuajse të gjithë vendin.

Në Angli, 12 gushti u regjistrua si dita më e ngrohtë e vitit 2024. Sipas të dhënave të Zyrës Meteorologjike (Met Office), temperatura më e lartë prej 34.8 gradë Celsius është matur në Kembrixh në vitin 2024 deri më tani. Gjithashtu thuhet se kjo është temperatura më e lartë e matur që nga 13 gushti 2022.

Gjatë periudhës nga qershori 2023 deri në qershor 2024, temperaturat globale thyen rekorde për 13 muaj rresht. Sipas sistemit të monitorimit satelitor Kopernikus të Bashkimit Evropian, 21 korriku u regjistrua si "dita më e nxehtë" globalisht në historinë e fundit.

Vitin e kaluar pati valë të nxehta të përhapura dhe të gjata në të gjitha kontinentet, të cilat kontribuan në ngrohjen e sipërfaqes së Tokës. Ekspertët parashikojnë se temperaturat e larta do të vazhdojnë të prekin shumë rajone në afat të shkurtër.

Evropa, e cila është shumë afër Arktikut, po ngrohet më shpejt se dyfishi i mesatares globale në 50 vitet e fundit.

/Motilokal.com