Ndërsa ekspozimi i moderuar në diell shoqërohet me shumë përfitime, ekspozimi i tepërt pa mbrojtje adekuate mund të jetë i rrezikshëm për shëndetin e nënës dhe fëmijës së palindur.
Përfitimet e ekspozimit ndaj rrezeve të diellit gjatë shtatzënisë janë:
Prodhimi i vitaminës D
Vitamina D është e nevojshme për shëndetin e kockave dhe forcon sistemin imunitar. Përkatësisht, vitamina D rrit përthithjen e kalciumit dhe fosfatit nga trakti tretës i një gruaje shtatzënë dhe është e nevojshme për rritjen dhe zhvillimin normal dhe mineralizimin e eshtrave dhe dhëmbëve të foshnjës tuaj.
Gjendja e përmirësuar dhe cilësia e gjumit
Ekspozimi ndaj rrezeve të diellit stimulon lirimin e serotoninës, një neurotransmetues i lidhur me përmirësimin e humorit dhe një ndjenjë mirëqenieje. Gjithashtu, ekspozimi në diell gjatë ditës ndihmon në rregullimin e ritmit cirkadian, i cili mund të ketë një efekt pozitiv në cilësinë e gjumit.
Rreziqet e ekspozimit
Ekspozimi i tepërt ndaj rrezeve të diellit shoqërohet me një rrezik të shtuar të djegies nga dielli dhe përkeqësimit të ndryshimeve të hiperpigmentimit (melasma) në lëkurën e grave shtatzëna. Gjegjësisht, për shkak të ndryshimeve hormonale gjatë shtatzënisë, lëkura e grave shtatzëna është më e ndjeshme ndaj efekteve të rrezatimit diellor (UV), i cili favorizon shfaqjen e ndryshimeve të përmendura të lëkurës.
Për të mbrojtur lëkurën tuaj, përdorni krem kundër diellit me një faktor mbrojtës të lartë (SPF 30 ose më i lartë), vishni veshje mbrojtëse, duke përfshirë një kapelë dhe syze dielli me mbrojtje UV dhe kërkoni hije kur rrezatimi i diellit është më i fortë.
Sipas disa studimeve, ekspozimi në diell gjatë shtatzënisë shoqërohet me një sasi të reduktuar të acidit folik, i cili është i nevojshëm për rritjen dhe zhvillimin e fëmijës suaj. Mungesa e acidit folik shoqërohet me shfaqjen e spina bifida dhe keqformime të tjera kongjenitale.
Sigurisht, si masë paraprake, shmangni rrezet e diellit intensive dhe afatgjatë në fillim të shtatzënisë, veçanërisht gjatë tremujorit të parë.
/Motilokal.com
