Mes përpjekjeve globale për të luftuar ndryshimet klimatike, shkencëtarët paralajmërojnë se mbjellja pa kriter e pemëve mund të përkeqësojë pa dashje ngrohjen globale, zbulon një studim i ri i botuar në revistën Nature Communications.

“Ka disa vende ku restaurimi i pemëve çon në rezultate neto negative klimatike”, thotë Susan Cook-Patton, bashkëautore e studimit të lartpërmendur dhe shkencëtare e lartë për restaurimin e pyjeve në organizatën globale mjedisore The Nature Conservancy.

Marrëdhënie komplekse midis pemëve dhe albedos

Hulumtimi nxjerr në pah ndërlidhjen komplekse midis pemëve dhe albedos, një masë e rrezatimit diellor të reflektuar nga sipërfaqja e Tokës. Ndërsa pemët thithin dioksidin e karbonit, duke zbutur kështu ndryshimin e klimës, ato gjithashtu ndryshojnë albedon, duke ndikuar në temperaturën e planetit. Cook-Patton thekson rëndësinë e përfshirjes së albedos në modelet klimatike, duke vënë në dukje se vlerësimet e mëparshme kanë mbivlerësuar efektin ftohës të mbjelljes së pemëve deri në 80 për qind.

Megjithatë, studimi i ri ofron njohuri të vlefshme për të udhëhequr politikëbërësit në optimizimin e strategjive për zbutjen e ndryshimeve klimatike.

Roli klimatik i albedos

“Po kështu, ka ende shumë vende ku ripyllëzimi është një ide e shkëlqyer për ndryshimin e klimës. Ne thjesht po përpiqemi t'i ndihmojmë njerëzit t'i gjejnë ato vende”, shpjegon Cook-Patton.

Albedo luan një rol kyç në rregullimin e temperaturës së Tokës, veçanërisht në rajonet e akullta ku sipërfaqet reflektuese si bora dhe akulli reflektojnë deri në 90 për qind të energjisë së diellit. Megjithatë, efektiviteti i mbjelljes së pemëve ndryshon në mjedise të ndryshme. Rajonet e lagështa tropikale si Amazona dhe Pellgu i Kongos njihen si vende kryesore për ripyllëzimin për shkak të sasisë së tyre të madhe të karbonit dhe ndikimit minimal në albedo.

Në të kundërt, fushat e buta dhe savanat tregojnë ndjeshmëri më të madhe ndaj ndryshimeve në albedo, duke reduktuar efektin ftohës të përpjekjeve për mbjelljen e pemëve. Edhe në vendet optimale, efekti aktual i ftohjes mund të jetë më i vogël se parashikimet deri në 20 për qind, kur merren parasysh rregullimet e albedos.

Mbjellja e pemëve është ende e rëndësishme

Pavarësisht këtyre nuancave, përfitimet e restaurimit të pyjeve mbeten të pamohueshme, duke përfshirë mbështetjen e ekosistemit, ajrin e pastër dhe furnizimin me ujë. Cook-Patton thekson rëndësinë e investimit strategjik në mbjelljen e pemëve.

“Në fakt bëhet fjalë për shfrytëzimin maksimal të investimeve të kufizuara dhe kthimin më të madh klimatik për hektar investim”, thotë ajo.

Ndërsa sfidat mbeten, planifikimi i menduar mund të maksimizojë ndikimin pozitiv të nismave të ripyllëzimit në mjedis dhe shoqëri.

/Motilokal.com