Do të ketë një sipërfaqe pesë herë më të madhe se ajo e Parisit dhe do të jetë e dukshme nga Hapësira. Kur të përfundojë, parku më i madh i energjisë së gjelbër në botë do të prodhojë mjaftueshëm energji elektrike për të furnizuar me energji një vend të tërë me madhësinë e Zvicrës.

Shkalla e projektit që po i kthen zonat djerrë të shkretëtirës së kripur në një nga burimet më të rëndësishme të energjisë së pastër në të gjithë planetin është aq e madhe sa që as personi përgjegjës i projektit nuk mund ta mbajë dot me detaje.

"Unë as nuk bëj më matematikë", tha Sagar Adani për CNN. Adani është drejtor ekzekutiv i Adani Green Energy Limited (AGEL) dhe nipi i Gautam Adanit, njeriu i dytë më i pasur në Azi. Pasuria prej 100 miliardë dollarësh e Adanit vjen nga Adani Group, importuesi më i madh i qymyrit në Indi dhe një minator kryesor i karburantit "të pistë".

Grupi u themelua në vitin 1988 dhe operon në industri të ndryshme nga portet dhe termocentralet deri tek media dhe çimentoja.

Njësia e energjisë së pastër AGEL po ndërton termocentralin e gjelbër diellor dhe të erës në shtetin indian perëndimor të Gujarat me një kosto prej rreth 20 miliardë dollarë.

Ai do të jetë parku më i madh në botë i energjisë së rinovueshme kur të përfundojë në rreth pesë vjet dhe do të prodhojë energji elektrike të mjaftueshme për të furnizuar me energji 16 milionë shtëpi në Indi.

Suksesi i Parkut të Energjisë së Rinovueshme Khavda është kritik për përpjekjet e Indisë për të reduktuar nivelet e ndotjes dhe për të përmbushur qëllimet e saj klimatike, duke përmbushur nevojat në rritje për energji të kombit më të populluar në botë dhe ekonomisë kryesore me rritje më të shpejtë.

Qymyri aktualisht përbën ende 70% të energjisë elektrike të Indisë.

I vendosur vetëm 19 kilometra nga kufiri i rrezikshëm me Pakistanin, parku do të mbulojë një sipërfaqe prej 518 kilometrash katrorë dhe do të jetë termocentrali më i madh në planet.

“Zona kaq e madhe, nuk ka kafshë të egra, nuk ka bimësi, nuk ka zonë banimi. Nuk mund të kishte një shfrytëzim alternativ më të mirë të kësaj toke”, tha Adani.

Planet madhështore dhe të gjelbra të grupit nuk janë prekur as nga viti i trazuar i vitit të kaluar, pasi një raport i "ekspertit" të dyshimtë Hindenburg Research akuzoi drejtpërdrejt grupin e minierave për dekada mashtrime.

Grupi indian e quajti raportin të pabazë dhe keqdashës, por kjo nuk ishte e mjaftueshme për të ndaluar rënien e tregut të aksioneve që fshiu rreth 100 miliardë dollarë nga vlera e kompanive të tij të listuara. Pasuria personale e Gautam Adanit gjithashtu mori një goditje, duke rënë më shumë se 80 miliardë dollarë pas publikimit të raportit.

/Motilokal.com