Sipas hulumtimeve nga Universiteti i Newcastle dhe Teesside, pijet energjike mund të kenë një ndikim negativ në trurin e fëmijëve pasi përdorimi i tyre rrit rrezikun e problemeve të shëndetit mendor, duke përfshirë çrregullimin e hiperaktivitetit të deficitit të vëmendjes (ADHD), depresionin, ankthin dhe mendimet për vetëvrasje.

Konsumimi i pijeve energjike synon të rrisë energjinë me kafeinë dhe stimulues të tjerë.

Të dhëna nga 57 studime

Në një studim të botuar në revistën Public Health, shkencëtarët morën parasysh të dhënat nga 57 studime që përfshinin 1.2 milion fëmijë dhe të rinj nga më shumë se 21 vende që konsumonin pije energjike.

Shkencëtarët britanikë e kryen këtë studim si vazhdimësi e hulumtimit fillestar të vitit 2016 dhe gjetën pasoja edhe më negative për shëndetin mendor dhe fizik të fëmijëve të shkaktuara nga konsumimi i pijeve energjike, tha për Fox News autorja kryesore e studimit, profesoresha Amelia Lake nga Universiteti i Teesside.

“Ne e përsëritëm hulumtimin vetëm për të gjetur më shumë prova, të dukshme, që tregojnë se konsumimi i këtyre pijeve është i lidhur me rezultate negative shëndetësore” shtoi ajo.

Nuk kanë vend në ushqimin e fëmijëve

Bazuar në këto gjetje, studiuesit dhe organizatat e tjera shëndetësore në Mbretërinë e Bashkuar i kanë bërë thirrje qeverisë të ndalojë shitjen e pijeve energjike për fëmijët nën 16 vjeç.

Përmbajtja e kafeinës në pijet energjike varion nga 50 mg në 505 mg për pije.

“Kjo dëshmi tregon se pijet energjike nuk kanë vend në dietën e fëmijëve dhe të rinjve”, përfundoi Lake.

/Motilokal.com